Madaxwanaha Jamuuriyada Soomaliland ayaa 14 diisembar, waxa uu magacaabay xubnaha wasiirada, wasiiro ku-xigeenada iyo wasiiru-dawlayaasha xukuumadiisa.
Qodobka 90 aad ee dastuurka ayaa awood u siinaya madaxwaynuhu in magacaabo wasiirada islamarkaan xilka ka qaadi karo.
Magacaabida kadib, waxa ay xukuumadu u soo gudbisay in ay ansixiyaan golaha wakiillada si ay waajibaadkooda shaqo u gutaan. Sida ku xusan qodobka 94 aad ee dastuurka jamuuriyada Soomaliland ayaa golaha wakiillada awood u siinaya in ay leeyihiin waajibaadka ansixinta ama diidmada ee golaha wasiirada.
Waxa uu qodobka 94 aad ee dastuurku tilmaamayaa, in wasiiradu ay golaha wakiillada ku horyimaadaan muddo 30 cisho gudahood ah si loo ansixiyo si ay waajibaadka madaxwaynuhu u igmaday u gutaan.
02 jeeniwari ayey golaha wakiilladu warqad u direen xukuumada kuna wargaliyeen asixinta golaha wasiirada. Guddi hoosaadyada golaha wakiillada ayaa kulamo la yeeshay dhammaan wasiirada si ay u hubiyeen in ay u qalmaan jagada loo doortay, gudana karaan waajibaadka madaxwaynuhu u igmaday.
3-5 jeeniwari, wasiiradu waxa ay la kulmeen guddi hoosaadyada golaha wakiillada oo wasiir walba guddi hoosaadka hawsha wasaaradiisu loo magacaabay khusayso hor yimid. Wasiirada ayaa ka hor jeediyey guddi hoosaadyada qoryashayaashooda, khibrada ay u leeyihiin shaqada loo igmaday iyo in ay guddan karaan waajibaadka madaxwaynuhu u doortay. Intaa kadib, guddi hoosaadyada ayaa qiimaynayey, una soo gudbineyey shir-gudoonka iyo xog-hayaha golaha wakiillada si loo ansixiyo.
Jeeniwari 6 waxa hor yimid golaha wakiillada 19 wasiir si loo ansixiyo. Guddoomiyaha golaha wakiillada Yaasiin Maxamuud Xiir oo shir guddominayey golaha waxa mid mid uu ugu dhawaqaay wasiirada magaciisa iyo jagada loo igmaday. Xog-hayaha guud ee golaha wakiillada ayaa xubnaha wasiirada mid mid u ugu hor akhriyey taariikhdiisa iyo khibradii xubnaha golaha wakiillada.
Wasiirada ayaa khudbad kooban oo qoryashayaashooda taabanaysa ka hor jeediyey xubnaha golaha, kana dalbaday in ay ansixiyaan.
Golaha ayaa wasiirada mid mid u gu codeeyey iyada oo ay fadhiyeen 66 xubnood. Inta u badan wasiirada ayey goluhu ku ansixiyeen dhammaan 65 xubnood oo aanu guddoomiyuhu codayn. Tan ayaa ah inta badan wasiirada in aanay jirin cid diiday ama ka aamustay.
Jeeniwari 7 golaha wakiillada waxa hor yimid 29 masuul oo iskugu jiray wasiiro, wasiiro-ku-xigeeno iyo wasiiru-dawlayaal. Kadib, markii xog-hayaha golaha wakiilladu ka hor akhriyey xubnaha golaha masuuliyiinta taariikhdooda iyo khibradooda, waxa ay goluhu u ansxiyeen mid mid. Masuuliyiinta badankooda ayaa helay dhammaan codka xubnaha 64 oo aanu guddomiyuhu codayn. Wadarta xubnaha fadhiyey golaha ayaa ahayd 65 xubnood.
Waxa jeeniwari 7 soo dhammaatay ansixinta wasiirada, wasiiro-ku-xigeenada iyo wasiiru-dawlayaasha xukuumada cusub oo ahaa 48 masuul. Xubnaha xukuumada cusub ayaa si toos ah u gudandoona waajibaadkii madaxwaynuhu u xushay in ay qaranka u qabtaan.
